【識聽，一定，聽，留言】
未接來電嘅留言、whatsapp嘅錄音，通常大家係點聽嘅呢？用耳筒、埋耳聽，定擴音？喺街可能都會耳筒多，但搭的士，就好多人用擴音。或者乘客係就咁揀播放，總之成個車箱都聽得一清二楚。
大部分情況都無乜嘢嘅，只不過有時有d留言就幾私人，甚至露骨，或者戇居，亦有歡笑。
「我樓下密碼係4689，你有鎖匙架啦。」
「老公（拖長音）你幾時返黎呀，我着左上次買果件粉紅色睡衣等你呀，我而家覺覺豬先喇，你返到黎就X醒我啦。」
「我地今晚」
「不如去」
「Er⋯⋯不如去呢」
「睇戲」
「好唔好呀。」
「ma⋯⋯ma⋯⋯卡卡卡。」
早更我唔知，夜更我臉紅又好，恥笑又好，後座乘客都唔會見到我，不過聽得多見得多，已經逐漸適應。唯獨有一次忍唔住插嘴。
「你有，三個，新，嘅口訊，未有，儲存訊息。」「訊息，黎自5201314⋯⋯」
「喂，先生，我係9413嘅司機呀，我到左邊寧頓街7仔喇，請問你喺邊？」
「要刪除訊息，請按一，要⋯⋯」
「訊息經已刪除，下一個口訊。訊息，黎自5201314⋯⋯」
「喂，先生，十分鐘喇⋯⋯」
「訊息經已刪除，下一個口訊。訊息，黎自5201314⋯⋯」
「仆你⋯⋯」
「訊息經已刪除，你有，零，個儲存訊息。」
其時我地就喺荔橋行緊，而上車地點，正正係邊寧頓街。
「先生，原來你叫左車架？」
「係呀，但見你行過咪上車囉。」
「下次最好唔好啦，個師傅都要特登揸過去接你。」
「咩呀，佢話五分鐘到，我諗住實喺樓下，落到黎見車就上啦。」
「唔係架，可能佢喺好遠趕過黎架。」
「哦，係咩。」
然後對話就無繼續落去，唔化嘅人點話都唔化，唯有喺呢度同被打荷包嘅師兄講聲唔好意思。確實，我明白作為乘客，只想喺特定嘅時間上車，喺幾個apps一齊落柯打，而一旦有車，就不管三七二十一就上左先，儘快回家。咁樣係不折不扣嘅自私，落實左柯打就應該等返果部車。就算真係極度趕，有N個理由都好，上左車都可以同原司機講返聲，唔好迫人留言問候丫。
美孚新邨自私男，呢段文字係畀你嘅留言，雖然遲左幾日，希望你有反省。
#lazytaxi
#的士
#taxi
Search